BACOLOD CITY — Patay ang isa ka tiyo matapos gintiro kag ginlabo sang iya hinablos sa ciudad sang Cadiz kagab-i.
Sa impormasyon nga nakuha sang Bombo Radyo, nagainom ang tiyo nga si Lino Patricio kaupod ang hinablos nga si Noel Pundag sa Sitio Macasayang, Barangay Mabini, ciudad sang Cadiz sang nagsukmaanay sanday Patricio kag ang iya utod nga babayi nga iloy ni Pundag.
Napatup-an ni Patricio ang iya utod rason nga nagpangakig si Pundag.
Nagkuha ini sang .38 caliber revolver kag gintiro si Patricio sang makaapat ka beses sa nagkalain-lain nga bahin sang lawas.
Wala pa ini nakuntento bangud ginlabo pa niya ini sang makaduha ka beses sa ulo nga gintunaan sang iya kamatayon.
Sa karon, priso ang hinablos sa Cadiz City Police Station.
Sa pihak nga bahin, patay ang isa ka lalaki matapos gintiro sa sulod sang baylehan sa Barangay Maricalum, ciudad sang Sipalay.
Sa impormasyon nga nakuha sang Bombo Radyo, nagasaot ang mag-utod nga sanday Molly kag Marlon Garcia sang nagluntad ang komosyon.
Asud-asud nga lupok ang nabatian kag nasapwan na lamang nga wala na sang kabuhi si Molly matapos mag-angkon sang igo sa ulo.
Padayon pa man nga ginabulong sa ospital si Marlon matapos makaangkon sang pilas sa nawala nga bahin sang iya tiyan.
