Ginsaulog sang ginakabig nga pinakatigulang nga mambabatok ukon manugtattoo sa Pilipinas nga si Apo Whang-Od ang ika-108 nga kaadlawan sini kahapon, February 18.
Sang nagaedad pa lang sang 15 anyos, gina-practice na ni Whang Od ang sinang-una nga art sang hand-tapped tattoos.
Santo sa tradisyon, ang mga warriors lang sang tumandok nga tribu Butbut ang makapa-tattoo kun may mapatay sila nga tawo.
Para naman sa mga babaye nga myembro sang tribu, ginakabig nga pampagwapa ang pagpa-tattoo.
Apang sa karun nga nagkalamatay na ang mga warriors, mahimo na nga magbaton sang tradisyunal nga tattoo ang tanan nga luyag sini.
Sa pagtattoo, nagausar si Whang Od sang pila ka mga gamit kaangay sang siit sang kabugaw, stick nga human sa kawayan, uling, kag tubig.
Sang ginpamangkot naman kun ano ang iya sikreto sa pagpangabuhi sang masobra sa isa ka siglo, ginpahayag ni Whang-Od nga wala sia nagakaon sang mga pagkaon nga de lata, may mantika, kag may preservatives.
Suno sa iya, nagakaon lang ini sang organic foods kaangay sang laswa kag beans.
