BACOLOD CITY — Ginaabi-abi sang Power Watch ang ginpatigayon nga transparency meeting sang Central Negros Electric Cooperative ukon CENECO kag ginpahayag nga patigayunon na tagsa ka bulan.
Suno kay Power Watch secretary-general Wennie Sancho, isa ka welcome development ang ginhimo sang CENECO sang Huwebes sang hapon sa idalom ni Board of Directors President Roy Cordova kun sa diin nagtambong man mismo si Sancho.
Apang ginarekomendar sini nga kuntani makadihon sang memorandum of agreement ang CENECO kag ang member-consumer-owners kun sa diin nakaplastar ang obligasyon sang tagsa-tagsa agud nga may sukton sa tion nga may salabton.
Aminado si Sancho nga mabudlay ang obligasyon sang presidente sang isa ka kooperatiba apang pagahatagan sini sang benepisyo sang pagpangduha-duha si Cordova nga masarangan sini ang iya obligasyon.
