Ginatun-an sang transport group nga Pagkakaisa ng mga Samahan ng Tsuper at Opereytor Nationwide (PISTON) ang pagduso sang pagpasaka sang P2 sa minimum fare sang jeepneys.
Sa interview sang Bombo Radyo Bacolod kay Modesto Floranda, National President sang PISTON, wala paman ang bigtime fuel price hike madamo na sang mga fuel stations nga nagpasaka sang presyo, samtang may-ara man sang mga nagdeklarar nga out of stocks.
Pahanumdom ni Floranda nga ini ang may dako nga epekto indi lamang sa driver kag operators, pati na sa commuters.
Ini bangod sa pagsaka sang presyo sang produktong petrolyo, sunod naman nga magasaka ang bili sang mga produkto.
Suno kay Floranda, sang 2013 pa ang ulihi nga pagpatuman sang fare increase.
Samtang nangin sunod-sunod naman ang pagsaka sang presyo sang gatong humalin pa sang Enero.
Sa ila computation, nagadangat sa P1,300 ang nagakadula sa income sang mga drivers kada adlaw, ukon P32,000 sa kada bulan.
Ini ang dako pa kuntani nga bulig sa ila tagsa ka pamilya.
Dugang pa ni Floranda nga mas dako pa ang pierde sang mga modernized jeepneys bangod mas dako man ang ila nga konsumo.
Suno diri, halos doble ang madula nga income sa mga modernized jeepney drivers, nga magadangat sa P84,000 kada bulan ukon P2,500 kada adlaw.
Samtang P200 kada adlaw naman ang nagakadula sa income sang taxi drivers, ukon P4,000 kada bulan.
Suno diri, sa pagrequest sang pagpatuman sang fare increase, ilatag man nila ang mga basihan kun ngaa kinahanglan magpasaka sang presyo.
P2 sa kada apat ka kilometro ang ila nga irequest, gani ang P13 minimum fare para sa traditional jeepneys ang magasaka na sa P15, samtang ang P15 nga minimum fare sa modernized jeepney ang ipasaka sa P17.
