Ginkumpirmar sang presidente sang Bacolod Alliance of Commuters, Operators and Drivers (BACOD) nga maga-upod ang pila ka grupo sang traditional jeepneys sa tatlo ka adlaw nga Nationwide Transport Strike sang National Transport Group nga MANIBELA subong nga Lunes, Marso 24 tubtob Myerkules, Marso 26.
Sa interview sang Bombo Radyo Bacolod kay Rudy Catedral, sila nga diri sa ciudad sang Bacolod ang magaupod sila panawagan ni MANIBELA president Mar Valbuena sa transports strike humalin sa Lunes tubtob Miyerkules.
Suno kay Catedral, sila ang magapatigayon sang untat-byahe bangud sa sala nga datos nga ginpagwa sang Land Transportation Franchising and Regulatory Board kun sa diin ginapakita nga madamo na ang nag-upod kag nagpaconsolidate sa ginakabig sini nga palpak nga programa nga PUV modernization program.
Suno diri sang Biyernes, Marso 21, nagmeeting sila ni DOTr Secretary Vince Dizon kag ginpatpat sini ang kamatuoran nga madamo sang nagkalahul-an nga driver-operators sang traditional jeepney sa ciudad sang Bacolod nga ginpabiyahe lang nga wala sang prangkisa, wala sang registrations kag insurance humalin sang Abril 30 sang tinalikdan nga tuig tubtob sa karun.
Ginpaimbestigaran Nakibot ang bag-o nga tiglikom sang Department of Transportation sa mga problema sang Jeepney Modernization Program.
Suno diri, kun kaluy-an duha ka semana humalin subong mahimo nga marenew na ang mga prangkisa sang mga unconsolidated jeepneys.
Gin-athag man sini nga wala sang rally-protesta nga patigayunon kundi indi lamang ang mga ini magwa sa ila nga mga garahe ang kapin 500 ka mga jeepney units nga magapartisipar sa untat-biyahe.
Ginalantaw sini nga mahimo maga-upod man ang iban nga transport groups kaangay sang Kabakod Negros Transport Coalition Incorporated (KNETCO) – Piston kag United Negros Drivers and Operators Center (UNDOC) – Piston.
Ini bangod ang tatlo ka grupo ang nagtingob sa Negros United Transport Coalition (NUPC) kag magadangat sa masobra isa ka libo ang magapasakop sa nationwide transport strike.
