Ginakalipay sang bise-alkalde sang Bacolod kag chairman sang Inter-Agency Task Force Against Coronavirus nga wala na sang may nareport nga kompirmado nga kaso sang COVID-19 sa ciudad humalin sang Abril 5.
Sa interview sang Bombo Radyo kay Vice Mayor El Cid Familiaran, ginpahayag sini nga isa na ka semana nga wala sang may nareport nga kaso sang nasambit nga balatian sa Bacolod City kag ginakabig niya ini nga maayo nga balita.
Suno kay Familiaran, may yara naman sang isa ka ospital sa ciudad nga wala sang may gin-admit ukon ginkonsulta nga may yara sang flu-like symptoms.
Nagalaom man siya nga magtayuyon na ini tubtob sa katapusan sang bulan.
Aminado man ang bise-alkalde nga madamo gihapon sang mga nagabayolar sa mga protocols ilabi na nga masako ang mga opisyales sa pagpanghatag sang mga relief goods kag bulig sa mga nagakinahanglan.
Gani naga-apela ini sa mga pumuluyo nga indi na magpasaway kag magpabilin nalang sa ila mga puluy-an agud makabalik na sa normal ang tanan sa mas madali nga panahon. Samtang,
aminado ang bise-alkalde sang Bacolod kag chairman sang Inter-Agency Task Force Against Coronavirus nga kun mabawi na ang enhanced community quarantine sa ciudad sang Bacolod kag probinsya sang Negros Occidental, ginakonsiderar sini ang dugang nga 15 ka adlaw nga pagpatuman sang travel ban sa luwas sang probinsya.
Sa interview sang Bombo Radyo kay Vice Mayor El Cid Familiaran, ginpahayag sini nga kun malift na ang ECQ kag magbalik na sa normal ang tanan, ginakonsiderar sini nga padayunon ang indi pagpasulod sang mga persona nagikan sa luwas sang probinsya para sa seguridad sang tanan.
Suno kay Familiaran, ang mga goods lang ang pahanugutan nga magsulod apang sa istrikto nga procedure ini maagi.
Suno sa iya, apisar nga isa na ka semana nga wala sang dugang nga kaso sa probinsya kag ciudad, indi dapat magrelax ukon magkumpyansa bangud may yara pa sang mass testing.
Naghingyo man ini sang kooperasyon sang tanan sa mga mando nga ginapatuman sang gobyerno agud maghilway na ang ciudad kag probinsya sa virus.
