Patay ang isa ka tricycle driver matapos nga ginbuno sang mag-utod sa Prk Malipayon, Brgy San Jose, Sipalay City sang Abril 6, 2026.
Ginkilala ang biktima nga si alyas Michael, 41 anyos, lalaki, single, tricycle driver; samtang ang suspect ang ginkilala naman nga sanday alyas Jansel, 19 anyos, single, panday kag alyas Roben, 29 anyos, single, hollow block maker, lunsay mga residente sang Purok Aboitiz, Brgy. San Jose, Sipalay City.
Si Jansel ang nadakpan apang si Roben ang at large sa karun.
Sa interview sang Bombo Radyo Bacolod kay Police Lt. Cipriano Lumanog III, Deputy Chief of Police sang Sipalay City Police Station, sang Abril 6, may yara sang nagluntad nga stabbing incident kun sa diin ang suspek kag ang biktima ang may daan na nga hiligut-anon.
Suno kay Lumanog, sa nasambit nga adlaw, ang biktima ang nagakay-o sang iya nga motorsiklo sang ginkomprontar ini sang suspek nga si Jansel kag sang iloy sang mga suspek.
Nagpadayon ang pagbaisay tubtob nagsulod si Roben kag didto na ginbuno ang biktima sa natuo nga tiyan.
Ang biktima gindala pa sa ospital apang sang ginabiyahe pa lang ini ginbawian na sang kabuhi.
Suno kay Lumanog padayon pa nila ginapangita ang isa sa suspek samtang ang isa ang ila na nga nadakpan.
Ang pamilya sang biktima ang mapasaka sang kaso batok sa mga suspek.
Murder naman ang kaso nga ipasaka batok sa mga ini.
