Alas-5:00 subong nga aga, napabilin pa sang Tropical Depression “QUERUBIN” ang kabaskugon sini samtang yara sa nasidlangan nga kadagatan sang Mindanao.
Ang sentro sang bagyo ang ulihi nga nasiplatan sa 230 km East sang Davao City ukon 205 km East sang Tagum City, Davao del Norte.
Ini ang nagadala sang hangin nga magadangat sa kabaskugon nga 45 km/h kag pagmadlos nga tubtob 55 km/h, samtang nagahulag sa North Northwestward nga dereksyon sa kadasigon nga 10 km/h.
Sa karun, napaidalom na sa Tropical Cyclone Wind Signal no. 1 ang Davao Oriental.
Sa masunod nga 24 oras, ginalantaw nga mapabilin sa north northeastward ukon northward ang track sang bagyo ukon sa kadagatan sa nasidlangan sang Mindanao.
Sa nasambitan nga tion, ginalantaw nga magahuyang ang Bagyo Querubin kag magabalik sa Low Pressure Area nga status.
Bwas tubtob sa Domingo, ginalantaw nga ang bagyo nga mahimo maghuyang sa LPA ang magalabay sa Mindanao, Sulu Sea kag Palawan.
Apisar nga ginalauman ang paghuyang, ginalantaw nga ini ang liwat nga makakuha sang pwersa pagdangat sa West Philippine Sea kag liwat nga magasanyog sa tropical depression category.
Subong nga Miyerkules, lauman ang maulanon nga panahon nga may mabaskog nga huyop sang hangin sa Davao Oriental nga yara sa karun sa Tropical Cyclone Wind Signal no. 1 tuga sang Tropical Depression “QUERUBIN”.
Mangin magal-umon man ang panahon nga magadala sang lapnagon nga pag-ulan sa Eastern Visayas, Caraga, kag nabilin nga bahin sang Davao Region bangod sa bagyo.
Kasubong man ang mabatyagan nga tiyempo sa Bicol Region kag Quezon, apang tuga naman sang Shear Line ukon pagugat-anay sang mabugnaw nga Hangin Amihan ukon Northeast Monsoon kag mainit nga hangin gikan sa Dagat Pacifico.
Mangin magal-umon man nga may lapnagon nga pag-ulan sa nabilin nga bahin sang Visayas kag nabilin nga bahin sang Mindanao bangod sa Trough ukon ikog sang Tropical Depression “QUERUBIN”.
Samtang maulanon man ang tiyempo sa Cagayan Valley, Cordillera Administrative Region, kag Aurora bangod sa Hangin Amihan.
Mangin makanay naman ang panahon sa Metro Manila kag nabilin nga bahin sang Luzon apisar nga apektado man sang Amihan.
