BACOLOD CITY — Nagpanguna ang isa ka Negrense sa Physician Licensure Examination subong nga tuig.
Si Kurl Eduvas Jamora nga may rating nga 91.08% ang naga-istar sa karon sa Bacolod City apang nakaagi man puyo sa Victorias City ang iya pamilya.
May mga himata man sila sa Silay City.
Sa impormasyon nga nakuha sang Bombo Radyo Bacolod, naggraduate ini nga Magna Cum Laude sa De La Salle Health Sciences Institute sang tuig 2017.
Gilayon man ini nga ginpanginbulahan sang city government sang Victorias sang nagligad nga tuig bangud sa iya nalab-utan.
Samtang sulod man sa top 10 ang graduate sang West Visayas State University sa La Paz, Iloilo City nga si Jill Therese Au, ang number 10 sa nasambit nga pasinawan, sa rating nga 89.58%.
Sa pag-panalawsaw sang Bombo Radyo, si Au ang taga syudad sang Bacolod.
Sa resulta nga ginpagwa sang PRC, kabug-usan nga 3,717 gikan sa 4,542 ang nakapasar sa PLE.
Top 1 performing school naman ang Cebu Institute of Medicine sa rating nga 99.33%, nga gin-sundan sang University of Santo Thomas sa rating nga 98.71%, University of the Philippines-Manila sa rating nga 98.59%, Pamantasan ng Lungsod ng Maynila sa rating nga 98.37%, St. Luke’s Medical Center sa rating nga 97.87%, kag Davao Medical School Foundation sa rating nga 96.91%, West Visayas State University-Lapaz sa rating nga 96.81%.
Yara man ang Ateneo de Manila University sa rating nga 96.81%, Silliman University sa rating nga 94.74%, kag Far Eastern University sa rating nga 94.01%.
