BACOLOD CITY — Naglupad na sang Miyerkules sang hapon ang inaugural flight halin sa ciudad sang Sipalay padulong sa ciudad sang Cebu.
Pasado alas 3:oo sang hapon sang nagbiya sa airstrip sa Barangay San Jose, Sipalay City ang Air Juan nga cessna plane.
Ini ang 9-seater nga eroplano.
Mismo si Negros Occidental Governor Alfredo Marañon Jr. ang nagpanguna sa amo nga kahiwatan.
Nagtambong man diri sanday Sipalay City Mayor Oscar Montilla, 6th District Congresswoman Mercedes Alvarez, Vice Governor Eugenio Jose Lacson kag iban pa nga opisyal sang Sipalay City kag Negros Occidental.
Magluwas sa Sipalay-Cebu, may yara man sang flight nga Sipalay-Iloilo.
Duha ka beses tagsa ka semana ang flight padulong sa Cebu nga amo ang kada Miyerkules kag Domingo samtang tagsa ka Lunes kag Huwebes naman ang Sipalay to Iloilo vice versa.
Ginalantaw nni Sipalay City Mayor Oscar Montilla Jr. nga daku nga bulig sa pagpasanyog sang turismo sang ila nga ciudad ang pagsugod sang pagbiyahe sang Air Juan, ang Cessna plane nga sarang makadul-ong sang mga pasahero gikan sa Sipalay padulong sa Cebu kag Iloilo.
Suno sa alkalde, ang pagbiyahe sang amo nga reklamo ang makapakilala sang Sipalay bilang isa sa mga tourist destinations sa Pilipinas.
Bangud mas mahapos na ang pagpadulong sa ciudad, suno kay Mayor Montilla, ginalauman nga pagatamdon kag magadugok na diri ang mga turista.
Dugang pa sini, maangot naman ang Sipalay sa iban nga tourist destinations kasubong sang Palawan, Bohol, Siargao, Cebu, Iloilo kag mangin sa Metro Manila paagi sa connecting flight.
Suno kay Mayor Montilla, ang Air Juan ang mangin panugod lamang kag kun magadamo na ang pasahero nga luyag magsakay diri, magailis ang tag-iya sang mas daku nga eroplano ukon magadugang sang flights kag posible, may iban nga airline companies man nga magabiyahe diri.
Samtang, plano man ni Montilla nga sementuhon ang 1.6 kilometros nga kalabaon sang runway apang ginpabutyag sini nga pagaunahon anay sini ang pagpalaba sini agud makaakomodar sang mga airbus ukon mas daku nga eroplano sa ulihi.
Sa madason nga tuig, posible iga-develop naman ang passenger terminal sang air strip.
