Nag-upod sa panawagan nga nationwide transport strike ang mga unconsolidated traditional jeepney drivers kag operators sa ciudad sang Talisay.
Alas-6:00 sang aga pa lamang kaina, nagtipon na ang mga drivers kag operators nga kabahin sa United Negros Drivers Operators Center (UNDOC) – PISTON sa Talisay City, nga gin-updan man sang mga katapo sang Kilosang Mayo Uno (KMU).
Sa interview sang Bombo Radyo Bacolod kay UNDOC-PISTON Talisay City Chairman Rodolfo Gardose, 90 porsyento sa mga jeep nga nagabyahe Bacolod-Talisay ang wala nagpaconsolidate, gani 10 porsyento na lamang ang mahimo makabyahe kun indi na mahatagan sang extension ang consolidation process sa Abril 30.
Aminado ang mga ini nga indi man nila mahimo balabagan ang luyag nga magbyahe, apang ang mga ini ang ila nga ginsugilanon.
Nakighinun-anon man ini sa mga jeepney drivers kag operators sa ciudad sang Silay nga mag-upod sa kawsa.
Apang aminado ini nga apisar duha ka adlaw ang panawagan sang nationwide transport strike, sila ang subong nga adlaw lamang maga-untat byahe.
Ang pagpatigayon sang untat byahe ang nakasugtan sang mga drivers kag operators kahapon, kag nakasugtan nga sila ang magasakripisyo sang isa ka adlaw para sa bwas damlag sang ila palangabuhian.
Kasunod sang kilos protesta sa National Road sang Talisay City, sila ang nagpadulong man sa Bacolod City agud mag-upod sa mga ginpatigayon nga protest caravan sa hapon.
Nagpangayo man ang mga ini sang pasaylo sa mga commuters nga maapektuhan sang untat-byahe, apang ginapakamaayo na lamang ni Gardose, nga gamay lamang ang apektado nga sektor bangod gindeklarar man sang gobyerno nga wala sang klase. Samtang, Alas-2:00 subong nga hapon, nagtipon ang masobra 1,000 nga mga unconsolidated traditional jeepney drivers kag operators kag masobra 500 nga traditional jeepney units sa ciudad sang Bacolod sa Good Year sa dalan Araneta, para sa protest caravan padulong sa Old City Hall.
Sa interview sang Bombo Radyo Bacolod kay Bacolod Alliance for Commuters Operators and Drivers Inc. (BACOD) President Rudy Catedral, sila ang naghugpong upod sa iban pa nga transport group sa ciudad sang Bacolod agud ipanawagan ang petisyon sang National Transport Groups nga MANIBELA kag PISTON, nga paghatag sang extension sa provisional authority sang ila nga pagbyahe.
Gin-athag sini nga ang mga nag-upod sa ila ang lunsay mga drivers kag operators lamang kag wala sang iban nga sektor, indi kaangay sa UNDOC-PISTON Talisay City nga gin-updan sang Kilosang Mayo Uno (KMU) sa ila nga rally-protesta.
Panindugan ni Catedral nga ini ang opening salvo pa lamang para sa ginapaabot nga sunod-sunod nga mga rallies kag meeting.
Nagapati ang mga ini nga nagsugot si President Ferdinand “Bongbong” Marcos Jr. nga indi na maghatag sang extension sa consolidation process bangod sa mga data nga ginapadala sa iya nga 90 porsyento na sang mga traditional jeepney units ang nakapaconsolidate.
Apang panindugan sini nga wala sang kamatuoran ang pahayag, bangod sa ila nga datos 23 porsyento lamang ang nakapaconsolidate.
Sila ang may natalana pa nga Congressional hearing sa Abril 22, kun sa diin una na nga nagpasalig ang pila ka mga kongresista nga sila ang magasuporta sa magamay nga sektor.
Dugang pa sini nga nakita sa mga hearing ang madamo nga kapaltahan sa Public Utility Vehicle Modernization Program kun sa diin nakita nga ginaduso lamang para sa personal nga interes sang pila ka mga opisyales sa gobyerno.
Panindugan sini nga sila ang indi magasulod sa consolidation bangod nakita na nila nga madamo sang nabankrupt kag halos indi makabayad sa monthly amortization sang modernized jeepney unit.
Dugang pa ni Catedral nga indi naman alkalde ang panulok nila kay Bacolod City Mayor Alfredo “Albee” Benitez kundi isa ka negosyante, bangod sa pagduso sini nga magtukod sang kaugalingon nga kooperatiba, nga pasudlan sang electric jeepneys.
Nagapati si Catedral nga matapos ang Congressional Hearing, magapagwa sang resolusyon sa pagpaiway sang PUV modernization, ipasaka sa Senado, nga sa ulihi mahimo magresulta sa pagveto sang Presidente sa programa.
