Isa sa panawagan sang presidente sang United Sugar Producers Federation (UNIFED) sa gobyerno ilabi na sa central office sang Department of Agriculture nga dapat islan ang mga personnel sang Department of Agriculture sa probinsya sang Negros Occidental.
Sa interview sang Bombo Radyo Bacolod kay Manuel Lamata, dapat islan na sang Department of Agriculture ang ila nga mga personnel ilabi na ang yara sa Bureau of Soils and Water Management bangud wala man ini nagatrabaho.
Suno kay Lamata, dapat sila ang islan bangud madugay na ang pagpaandam sang PAG-ASA nga magaluntad ang El Niño apang wala ang mga nagpreparar agud nga mabuligan nga mga maapektuhan nga mangunguma.
Suno kay Lamata, kun nagatrabaho ang mga personnel sang Bureau of Soils and Water Management sang Department of Agriculture, nakapatigayon na sila sang cloud seeding sa kasagsagan sang El Nino.
Apang sabaylo wala ang mga nagpatigayon sang cloudseeding bangud wala sang seedable clouds kag nagakahangawa nga maapektuhan ang pagpamunga sang mga Manga.
Suno diri, sa karun pa nga nag-ulan na kag may bagyo amo pa sila naghulag agud nga magpatigayon sang cloudseeding nga indi na kinahanglan.
Samtang nagsuggest man ini nga kun may budget ang cloud seeding, ibakal nalang sang probinsya sang eroplano agud may gamiton sa masunod nga El Nino agud makacloud seeding ang probinsya kag indi na maghulat sa national government.
