Ginpanindugan sang Presidente sang United Sugar Producers Federation (UNIFED) nga dako ang mabulig sang cloud seeding para sa mga sugarcane planters sa probinsya sang Negros Occidental, ilabi na sa preparasyon para sa planting season sang tubo.
Sa interview sang Bombo Radyo Bacolod kay Manuel Lamata, dungan kuntani ang cloud seeding operation sang Bohol kag Negros Occidental, apang ini ang napaiway bangod sa konsiderasyon sa posibilidad sang lahar flow partikular na sa banwa sang La Castellana.
Ginapakamaayo na lamang sini nga kahapon apisar wala nadayun ang cloud seeding ang probinsya ang gingrasyahan sang natural nga ulan.
Nagalaom ini nga maubos na ang mga ash deposit sa ibabaw sang bulkan agud wala na sang kahangawa sa lahar flow kag maka-umpisa naman sa cloud seeding ang probinsya.
Sa pagkahibalo sini, 15 ka adlaw magalawig ang patigayunon nga cloud seeding.
Ang magamay nga eroplano ang nakahook-up sa isa ka satellite nga nagatrace sang cloud clusters kag magapadala sang GPS coordinates nga amo sundan sang piloto.
Ang piloto kag ang personnel nga magabubo sang asin sa gal-om ang lunsaya gikan sa Philippine Airforce samtang ang mga personnel sang Department of Agriculture ang magamonitor lamang sa idalum.
Paathag ni Lamata nga iodized salt ang ginagamit sa cloud seeding kag yara sa 300 kilos sang asin ang masakay sa tagsa ka lupad sang eroplano.
Aminado si Lamata, nga ulihi na antes naghulag ang DA, apang ini ang mas maayo nalang sangsa wala.
Ini bangod kinahanglan gihapon sang mga tubo sang dugang nga tubig ilabi na nga yara lamang sa isa ka tapak ang salupsop sang regular nga ulan sa duta.
Ang El Niño ang segurado naman nga makatuga sang 10 tubtob 15 porsyento nga pagnubo sa produksyon sang kalamay.
Sa pihak nga bahin, nakahalit man ang ash fall sa mga katubuhan bangod sa pagtupa sang abo sa mga dahon, ini ang nagakasunog bangod sa init.
Samtang sa ginpatigayon nga soil sampling, natukiban nga nagnubo ang soil PH level sang duta nga natup-an sang ashfall sa 3 tubtob 4 gikan sa normal PH level nga 6.
