BACOLOD CITY – Ginpaguwa na ang affidavit ni Ricky Serenio, ang bagman sang drug lord sang Bacolod kag Negros Occidental nga si Victoria alias Berya Tolentino, nga nagaunod sang mga gin-alegar nagabaton sang payola kabaylo sang proteksyon sa illegal drug trade.
Sa ginsumpaan nga pahayag ni Serenio, 43 katawo ang ginhingadlan sini kun sa diin 32 ang mga katapo kag opisyal sang Philippine National Police, tatlo sa National Bureau of Investigation, lima sa Philippine Drug Enforcement Agency kag isa sa Criminal Investigation and Detection Group.
Kalakip sa mga opisyal sang pulis sanday Ret. Police Regional Office 18 Director PCSupt. Conrado Capa kag karon Negros Occidental Police Provincial Office Director PSSupt. William Señoron, nga gin-alegar nagatunga sa hepe sang Regional Special Operations Task Group sa ginapangayo nga isa ka milyon ka pesos kada bulan.
Ang iban naman ang may ranggo nga police officer 1 pasaka sa police superintendent.
Magluwas sini, hingalanan man sini ang kagawad sang Brgy. Zone 12-A, ciudad sang Talisay nga si Edwin de Pedro nga suno sa affidavit, nagpakilala nga taga-Bombo Radyo.
Una na nga natumod nga madugay na nga indi katapo sang Bombo Radyo Bacolod ang yara sa payola list, kag sa baylo, yara sa Radyo Veritas si De Pedro bilang volunteer reporter.
Posible nga madugangan pa ang ngalan sang mga naulamid sa illegal drug trade kag handa si Serenio nga magpatigayon sang supplemental affidavit kun madumduman na niya ang ngalan sang mga ini, kalakip na ang isa pa ka nagpakilala taga-Bombo Radyo.
Ang sworn affidavit ginhimo ni Serenio sadtong Byernes sa atubang ni Bacolod City Prosecutor Dennis Jarder.
