Nasapwan ang isa ka utod nga nawala nga tiil nga nakasulod sa itom nga plastic sa Purok Proper, Barangay Hilamonan, Kabankalan City kahapon sang hapon.
Sa interview sang Bombo Radyo Bacolod kay Police Lt Col. Roberto Indiape, officer in charge sa Kabankalan City Police Station, ang utod nga tiil ang nasapwan pasado alas-4:00 sang hapon, kag nareport sa ila alas-7:30 kagab-i.
Ini ang nasapwan ang mangunguma nga magapatubog kuntani sang karbaw sa maligwin nga lugar, sang napanimahuan sini ang naga-alisngaw nga baho.
Sang iya ginpangita, didto na sini nasapwan ang itom nga plastic bag kun sa diin yara sa sulod ang nawala nga tiil.
Ginabanta duha tubtob tatlo ka adlaw na sa lugar ang batiis bangod ini ang nagakaging kag nagagit-om na kag amat-amat naman nga nagaka-agnas.
Suno kay Indiape, indi pa matumod kun ang batiis ang iya sang babayi ukon lalaki.
Ang tiil ang gindala na sa punerarya agud mapreserve samtang ginapatigayon ang imbestigasyon.
Panawagan ni Indiape sa pamilya nga may himata nga missing ukon na-utdan sang tiil, nga magpahibalo sa Kabankalan City Police Station agud makabulig sa imbestigasyon kag mapasakaan sang kaso sa tion nga matumod na ang suspetsado.
