Indi na magpasaka sang kaso ang pamunuan sang Vallacar Transit Incorporated sa foreign national nga nagpanglampos sang pwertahan sang ceres bus nga nagtuga sang alarm and scandal sa mga pasahero sa highway sang Brgy. San Juan, Pontevedra, Negros Occidental.
Sa interview sang Bombo Radyo Bacolod kay Jade Marquez, media relations officer sang Vallacar Transit Inc., ang foreign national ang nagpara sang bus sa highway sang San Juan sa banwa sang Pontevedra.
Ang bus ang nag-untat kag ginbuksan ang pwertahan apang antes ini magsaka ginhandusan sini sang baston niya ang pwertahan kun sa diin nabuka.
Suno kay Marquez, sang nakasaka na ini bus nagtuga naman ini sang alarm and scandal.
Agud nga maprotektahan ang mga pasahero nagtawag ini sa mga inspector kag ginkadtuan man sang police.
Gindala pa ini sa Rural Health Unit sang Pontevedra antes gindala sa police station para sa imbestigasyon.
Suno kay Marquez, nagpromisa ang live-in partner sang foreign national nga balikan nila sa June 5 ang naguba nga pwertahan kag ipakay-o.
Ginalantaw man sini nga mahimo nga may indi pagintsindihanay sa tunga sang live-in partner niya gani natabo ang insidente.
