Ipakakas ni Punong Barangay Jason Ligaya sang Barangay 16, Bacolod City ang iya vendo carwash nga nahamtang sa nasambit nga lugar.
Ini kasunod sa ginpasaka ni Bacolod City Legal Officer Atty. Karol Joseph Chiu nga kaso nga grave misconduct kag criminal case sa paglapas sa RA 3019 ukon Anti-Graft and Corrupt Practices Act matapos nga wala nagsunod ang Punong Barangay nga ipabilin ang katinlo sang sidewalk sa nasakupan nga barangay.
Sa interview sang Bombo Radyo kay Punong Barangay Ligaya, ginpahayag sini nga wala siya nakabaton sang warning nga ma-file ang City Legal sang kaso batok sa iya.
Gin-ako sini nga siya ang gapanag-iya sang vendo carwash apang suno diri, ang iya ma-income ang ginabulig niya sa mga nasakupan nga pumuluyo.
Suno kay Ligaya, sang nabaton sini ang nagligad nga notice, ginpangkakas man nila ang mga nagabalabag sa dalan lakip na ang atop kag trapal sang iya vendo carwarsh.
Suno diri, kahapon nagkadto na siya kay Atty Chui bangud luyag man niya nga maathagan kag mabatian ang iya nga bahin.
Pahayag sini, ipakakas na niya ang iya vendo carwash bilang respeto man sa gobyerno.
Nagapanawagan ini nga mangin patas ang ciudad bangud unfair para sa iya nga madamo pa sang iban nga barangay nga nagakinahanglan nga aksyunan kag nakibot na lamang siya nga big deal kag ipakakas gid ang iya nga vendo carwash.
