Nagpanindugan si Vice President Sara Duterte nga wala sang misuse ukon indi insakto nga paggamit sang confidential funds sa Office of the Vice President (OVP) sang 2022.
Ini ang ginpahayag sang bise-presidente matapos ang pahayag ni House Deputy Minority Leader France Castro nga ground for impeachment ang ginaalegar indi sini pagcomply sa rules para sa P73 million confidential funds sang 2022.
Suno kay Duterte, wala sang misuse sa maskin ano nga pondo apang may yara lamang sang wala katapusan nga political attack nagikan sa Makabayan-Romualdez-Marcos alliance agud matabunan ang matuod-tuod nga problema sang pungsod sa karun.
Suno sa iya, ini ang masubo para sa mga pigado kag nagakagutman bangud sa pagsaka sang presyo sang pagkaon.
Ginhambalan man sini ang iya mga kritiko nga dapat nga magtrabaho anay antes nga magpamulitika.
Ang Commission on Audit (COA) ang nagpagwa sang isa ka Notice of Disallowance sa P73 million out of P125 million confidential funds sang Office of the Vice President sa idalum ni Duterte sa sulod lamang sang 11 ka adlaw.
