Indi pa matumod sang Victorias City Police Station kun accidental firing gid man ang gintunaan sang pagkamatay sang isa ka pulis kag isa ka sibilyan sa ciudad sang Victorias kagab-i.
Ginkilala ang mga biktima nga sanday Patrolman Jonel Lutao, 26-anyos sang Batus Brillantes, Brgy. 1, kag James Carl Hernal, 26 anyos sang Estrella Village, Brgy. 6 sang nasambit nga ciudad.
Sa interview sang Bombo Radyo kay Police Lt. Col. Mary Rose Pico, ginpahayag sini nga wala sang may nagluntad nga paglalisay sa tunga sang duha ka mag-abyanay.
Suno sa iya, naga-inom ang mga biktima kaupod ang ila duha pa gid ka mga abyan nga kanday Kelvin John Pedrajas kag Florence John Tianga sa balay ni Pedrajas nga SK Chairman man sang nasambit nga barangay.
Gindugang man sang hepe nga sa pahayag ni Tianga, nagapili ini sang kanta sa songbook sang nakit-an niya nga gindaho ni Sernal kay Lutao ang isa ka Glock 17 nga pusil kag gilayon lang ini nga nakabati sang lupok kag nakit-an nga nagahamyangon na sa salas si Sernal.
Gilayon naman nga nagwa si Lutao kag gintiro ang kaugalingon.
Nakabati sila sang tatlo ka lupok kag sang nagwa ang mga ini, wala na sang kabuhi ang patrolman.
Nakaangkon sang igo sa ulo si Sernal samtang sa baba naman ang igo ni Lutao.
Sa karun, suno kay Pico, nagapadayon pa ang ila nga imbestigasyon kag ginakabig man nga persons of interest sanday Tianga kag Pedrajas.
Nagapati man ang amay sang SK Chairman nga abyan sang mga biktima nga aksidente ang nagluntad nga pagluthang kay Sernal.
Sa interview sang Bombo Radyo kay Kent Pedrajas, ginpahayag sini nga mag-abyanay na halin sang gamay ang apat.
Suno kay Pedrajas, sang nag-inom ang mga ini sa ila puluy-an, wala man sang may nagluntad nga pag-inaway ukon komprontasyon, gani nagapati ini nga aksidente ang natabo.
Suno sa iya, posible nga nakonsensya si Lutao sang matiro niya si Hernal gani gintiro man sini ang iya nga kaugalingon.
