BACOLOD CITY – Nagaugyon ang isa ka boxing analyst sa nangin desisyon sang hurado sa “Battle of Brisbane” kun sa diin nalutos ang Pambansang Kamao nga si Senator Manny Pacquiao batok kay Jeff Horn pinaagi sang isa ka unanimous decision.
Sa exclusive interview sang Bombo Radyo Bacolod, ginpahayag ni Alex Vidal nga husto lamang nga gindeklarar nga daog ang Australyano bangud klaro ang pagkalutos sang 38-anyos nga si Pacman sa 29-anyos nga si Horn.
Suno sa iya, kuntani madugay na nga nagretiro si Pacquiao si pagboksing, ilabi na sadtong ginlutos ini ni Floyd Mayweather Jr., bangud naglapaw na ini sa iya nga panahon kag subong, oras na sang mga bag-uhanon kag gutom sa kasikatan kag kadalag-an kasubong ni Horn.
Nahibaluan nga siyam katuig na nga wala sang natumba sa ibabaw sang ring ang Pinoy ring icon.
Samtang, nagdistansiya naman si Vidal sa posibilidad sang rematch sa tunga nanday Pacquiao kag Horn.
Suno sa iya, normal lamang sa karon nga makabatyag sang pressure ang Fighting Senator bangud naanad na ini nga nagakahatag sang kadunggan sa Pilipinas apang suno kay Vidal, wala sang dapat ikahuya si Pacquiao sa gindangatan sini.
Laygay pa sang boxing analyst, tutukan na lamang ni Pacman ang karera sini sa politika.
“What he should do is to focus on his career as a Senator and stop fighting.. You cannot paddle your canoe in two rivers”.
Sa karon, uyat na ni Horn ang WBO Welterweight belt ni Pacman.
