-- ADVERTISEMENT --

BACOLOD CITY — Pito na ka mga persona ang nadakpan nga nagalapas sa Anti-Smoking Ordinance sa ciudad sang Bacolod.

Ang mga nadakpan ang lunsay mga pasahero sang public utility jeepneys kag gindakop sang mga personnel sang Bacolod Traffic Authority Office.

Suno kay BTAO Head Police Supt. Luisito Acebuche, gindakop ang mga natungdan tinalikdan nga adlaw.

Ini ang kabahin sang pagpatuman sang City Ordinance 614 kag wala pa nalakip ang nationwide smoking ban nga ginmandu ni Presidente Rodrigo Duterte pinaagi sa Executive Order.

Sila ang gin-issuehan sang citation ticket nga dapat magbayad sang 500 pesos nga multa sa sulod sang 72 oras.

-- ADVERTISEMENT --

Pananglitan indi makabayad sang multa suno kay Acebuche, pagakasuhan na ang mga ini.

Sang nagligad nga semana, ginpagwa ni Bacolod City Mayor Evelio ‘Bing’ Leonardia ang Executive Order No. 22 nga nagatukod sang Bacolod Anti-Smoking Task Force.

Miyerkules sang aga, nagsapol ang mga ini kalakip na ang isa sa mga miyembro nga amo ang Bacolod City Police Office.

Suno kay BCPO Director Police Senior Supt. Jack Wanky, wala pa sila nakasugod sa pagpangdakop bangud may pila ka mga butang nga ginaplantsa kag gin-istoryahan ini sa pagsinapol sa Bacolod Government Center.