BACOLOD CITY — Masobra na sa 100 mil pesos ang koleksyon sang ciudad sang Bacolod nagikan sa multa nga ginbayaran sang mga motorista nga nadakpan nga wala nagasuksok sang helmet.
Suno kay Police Supt. Luisito Acebuche, hepe sang Bacolod Traffic Authority Office, 861 na tanan ka mga violators ang ila nadakpan sa sulod gid lamang sang lima ka adlaw, humalin sang Lunes, Marso 27.
Bangud sini, nakakolekta na ang city government sang kabug-usan nga 110 mil pesos nga multa.
Nahibaluan nga nagabayad sang 300 pesos ang violators sa 1st offense; 500 pesos sa 2nd offense; kag 1000 pesos sa 3rd offense; samtang 1, 300 pesos naman kun wala sang helmet kag wala sang lisensya.
Sang damlag lang, ginsuspend sang BTAO head ang apat ka mga traffic enforcers nga nakuhaan sang video nga wala sang helmet samtang nagasakay sa motorsiklo; samtang may duha man ka pulis nga miyembro sang BTAO kag police station 1 nga nadakpan man nga wala sang helmet.
