May mga kahigayunan gid sa atun kabuhi nga nagahimo kita sang mga bagay nga indi nagadakadapat bangud sa pila ka mga sirkumstansya ukon bangud man nga desperado na ang isa ka tawo.
Kaangay lamang sang gina-estoryahan sa karun online may kaangtanan sa isa ka British YouTuber nga si Max Fosh matapos niya nga gin-peke ang iya kamatayon agud nga makuha ang $50 nga refund gikan sa isa ka airline.
Suno kay Fosh, wala niya nagamit ang ginbakal niya nga plane ticket, apang suno sa pagsulundan sang airline, kamatayon lamang sang pasahero ang ila batunon nga rason para ma-refund ang bayad.
Bangud sini, nagpadulong si Fosh sa Seborga, Italy, agud magkuha sang “death certificate” gikan sa isa ka lokal nga opisyal.
Ginpasa niya ini sa airline bilang pamatuod nga “patay” na siya.
Apang suno sa iya nga abogado, delikado ang ginhimo ni Fosh kag mahimo siya nga makasuhan sang fraud apisar nga ‘joke’ lamang ini.
Wala sa gihapon nakuha ni Fosh ang refund, apang nag-trending ang iya nga video kag nag-angkon sang madamo nga reaction sa social media.
