Sa panahon sa karun madamo na ang mga vloggers kag kun ikaw isa sa ila, himuon mo ang tanan agud nga makakuha lamang sang madamo nga views.
Kaangay lamang sang ginhimo sang isa ka social media streamer nga gin-aresto matapos nga ginbutang sini ang pink nga panty sa iya ulo agud lamang nga makahakot sang views.
Siya ang ginkilala kay Zokkunzokkun, 51-anyos kag isa ka Japanese streamer.
Naaresto siya matapos nga nakita siya nga nagalakat kag nagadalagan sa isa ka residential area sa ciudad sang Ichikawa samtang nagasuksok sang isa ka white gym uniform, pula nga bloomers kag pink nga panty nga nagatabon sa iya nga nawong.
Suno sa mga report gin-livestream ni Zokkunzokkun ang nasambit nga eksena sa iya nga online channel nga may masobra 5,000 followers.
Suno diri tinutuyo sini kuntani nga makakuha mas madamo nga viewers.
Apang sabaylo nga mangin famous, gin-ulan ini sang pagpakamalaot kag ini ang napriso.
Madamo sang mga residente ang nagtawag gilayon sa mga police matapos masaksihan ang pinasahi nga eksena.
Sa ginpatigayon naman nga imbestigasyon, gin-ako ni Zokkunzokkun nga ginhimo niya ang stunt para lamang masapakan lamang kag magdamo ang iya nga viewers.
Nakumpiskar man sang mga otoridad ang pila ka mga gamit nga ginagamit sini sa livestream.
