Ginakwestyon sang labor advocate ang pronouncement nga ginhimo sang Regional Tripartite Wages and Productivity Board (RTWPB) Region 6 chairperson nga may-ara sang ipatuman nga wage hike apisar nga may natalana pa nga public hearing.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA), sang Oktubre 11, nag-anunsyar si Department of Labor and Employment (DOLE) Region 6 director Atty. Sixto Rodriguez Jr., chairperson sang Regional Tripartite Wages and Productivity Board (RTWPB) nga okay na ang wage hike para sa Western Visayas kag sa Nobyembre 16 makapagwa na sang wage order.
Suno kay Sancho, natingala ini sa anunsyo bangod may nakaschedule pa nga consultation kag public hearing sa Negros Occidental Provincial Capitol sa Oktubre 21.
Ginalantaw sini nga ang ginbasihan lamang amo ang assessment sa Iloilo kag wala na ginkonsiderar ang sitwasyon sa Negros Occidental.
Dugang pa sini nga apisar nag-anunsyo sang wage hike, wala man sang ginhambal nga kantidad.
Gindumdom sini sang tinalikdan kun sa diin ang una nga wage hike nga P50 ang nasundan sang P40, nga kuntani dapat nagadako ang balor sang ginasaka sa sweldo kada tuig.
Ginakahangawa sini nga P20 na lamang ang ihatag subong nga tuig.
Panindugan ni Sancho nga dapat lantawon ang consumer price index, kun sa diin makita nga ang restoration pa lamang sang purchasing power ang magakinahanglan na sang P110 tubtob P150.
Apang ginakwestyon sini kun ngaa wala nagatingog ang duha ka labor representatives nga dapat amo ang nagadepensa sa kinamatarong sang mga mamumugon.
