Sarang pa nga marevise ang kontrata para sa pagtukod sang major project nga diversion channel sa ciudad sang Bacolod.
Nahibaluan nga ang proyekto nga may budget P130 million ang nagatarget nga derekta nga mapagwa ang tubig gikan sa Mambuloc Creek padulong sa baybay sa bahin sang BREDCO port.
Apang ang kontrata ang natapos na subong nga adlaw apisar nga wala pa natapos ang Phase 1 sang proyekto.
Sa interview sang Bombo Radyo Bacolod kay Bacolod City Lone District Congressman Greg Gasataya, 47 percent na ang natapos sa Phase 1 nga target matapos subong nga 2024.
Pasalig ni Gasataya nga indi maapektuhan ang proyekto sa banning may kaangtanan sa 2025 Midterm Elections, bangod may nakatalana na nga budget.
Samtang apisar natapos na ang kontrata subong nga adlaw, ini ang sarang naman nga marevise bangod ang pagka-atrasar sang proyekto ang tungod sa pila ka mga obstructions.
Dugang pa sini nga nagaka-untat man ang proyekto bangod sa mga pag-ulan.
Suno kay Gasataya, ang Phase 2 sang proyekto ang magafocus naman sa pagkonekta sang mga local drainage sa diversion channel.
Magatukod man sang flood wall agud nga indi magsulod ang tubig sa tion sang high tide kag indi magsugata sa ginapagwa nga tubig gikan sa Mambuloc Creek.
