Isa ka wala sang puluy-an nga lalaki ang nasapwan na lamang nga wala na sang kabuhi sa Burgos Extension, Villa Angela Subdivision, Barangay Villamonte, Bacolod City subong nga aga.
Sa inisyal nga impormasyon nga natipon sang Bombo News Team, ang lalaki ang wala sang pamilya kag nagatukod lamang sang hayob-hayob nga human sa plastic kag sako sa bakante nga lote kun sa diin ini nasapwan.
Bangod may-ara sang ginaconstruct nga building sa kaingod sini, nasapwan na lamang sang isa sa mga construction worker nga wala na ini sang kabuhi.
Ang lalaki nga ginabanta 40 tubtob 50 anyos ang pila naman ka bulan nga nagatinir sa lugar.
Ini ang nakasuksok sang pula nga bayo kag brief nga puti, sang ini ang nasapwan nga nagakulob kag wala na sang ginhawa.
Bangod wala man sang makita nga sign of struggle in plain view, ginalantaw nga mahimo ang biktima ang napatay bangod nagutman ukon naheat stroke bangod sa tuman nga kainiton sang tiyempo.
