Bwas pa maga-umpisa ang actual exercises sang Regional Marine Pollution Exercise (MARPOLEX) sang Philippine, Japan kag Indonesia Coast Guard.
Kahapon nag-abot ang dalagkuan nga sakayan sang tatlo ka pwersa diri sa ciudad sang Bacolod, samtang subong nga adlaw nagpatigayon sang symposium agud diskusyunan ang patigayunon nga exercise bwas.
Sa welcome remarks ni Maritime Department of Transportation (DOTr) Assistant Secretary Julius Yano, dako ang pasalamat sini sa suporta sang iban nga pungsod partikular na sang Japan kag Indonesia.
Pinaagi sa Regional MARPOLEX, mapadayun ang pagbayluhanay sang mga ideas kag best practices kag mapabaskog pa ang partnership sang mga pungsod.
Gindumdom man sini ang tuman ka dako nga nangin kahalitan sang oil spill sa pila ka bahin sang Pilipinas sang nakaligad, nga isa sa mga dapat masolbar.
Gani ang Philippine Coast Guard ang tuigan nga nagarecruit sang mga bag-o nga dedicated personnel.
Isa sa haligi sang ila pagserbisyo amo ang maprotektahan, mapreserve kag maconserve marine environment.
Bwas, magasugod na ang mga water exercises sa kadagatan sa tunga sang Guimaras kag Iloilo kalakip sang search and rescue, fire fighting, oilspill recovery, equipment recovery kag damage assessment.
Ginpasalig naman sang PCG nga wala sang matabo nga delays sa regular nga byahe sang mga barko bangod sila ang ginhatagan naman sang right of way.
Samtang ang mga mangingisda ang ginpanugyanan naman nga sa iban nga bahin sang kadagatan anay magpanagat.
