Naumpisahan na sang Negros Occidental ang preparasyon sa pag-host sang probinsya sa pala-abuton nga Western Visayas Regional Athletics Association (WVRAA) Meet 2024.
Sa interview sang Bombo Radyo Bacolod kay Hernani Escullar, public information officer sang Department of Education-Western Visayas, maga-umpisa ang WVRAA sa Mayo 2 tutbtob 7 nga iga-host sang Negros Occidental- DEPED Division kag Bacolod City- DEPED Division naman ang co-host diri.
Suno kay Escullar, majority sa venue ang patigayunon sa ciudad sang Bacolod kaangay na lamang sa Panaad Stadium, Paglaum Sports Complex kag mga buluthuan.
May patigayunon pa nga solidarity meeting sa Abril 30 para sa mga coaches kag officials sa pag-finalize sang schedules sang games, events kag billeting areas.
Kasubong man nga pagadiskusyunan ang outdoor games ilabi na sa karun nga mainit ang tiymepo, nga suno kay Escullar, nga wala sang ano man nga hampang nga patigayunon humalin alas- 10:00 sang aga tubtob alas- 3:00 sang hapon.
Pahayag ni Escullar, napadangat naman sini sa probinsya sang Negros Occidental kag ciudad sang Bacolod, ang pagsiguro sang supply sang tubig, kuryente kag security sang mga participants.
