BACOLOD CITY – Sa sobra nga pagdali-dali nga makuha ang premyo bilang tagdaog sa Buena Mano Salvo Special Draw, nalipatan sang isa ka maukod nga tagpalamati sang Bombo Radyo nga magsuksok sang “bra”.
Pagaliguon na kuntani ni Victoria Matias, 67-anyos, ang iya apo sang hinali ginlawag ang iya ngalan bilang tagdaog sang isa kalibo ka pesos nga cash sa Buena Mano Salvo Special Draw sa Bombo Radyo Bacolod.
Napun-an sang tuman nga kalipay si Lola Victoria sang mismo ang bata sini nga nagapamati man sa Bombo Radyo ang nagpahayag nga nagdaog ini sa promo kag may yara lamang ini sang isa ka oras agud nga ma-claim ang iya padya.
Bangud sini, gilayon nga naguwa sa ila balay si Lola Victoria upod sa iya apo nga iya kuntani pagaliguon.
Samtang sakay sa traysikol, namutikan sini nga matawhay ang iya pamatyag kag didto na sini namulalungan nga wala gali siya nakasuksok sang pang-ibabaw nga underwear ukon bra.
Apang wala ini ginpaminsar ni Matias bangud sa iya paminsaron amo nga makahingagaw ini sa deadline.
Gin-utang man sini ang plete sa traysikol bangud wala na ini nakadala sang kwarta bangud sa sobra nga pagdali-dali.
Suno kay Lola Victoria, tuman kadaku ang iya pasalamat sa Bombo Radyo bangud nahatagan ini sang tsansa nga magdaog sa tion nga wala gid sila sang inugbakal sang bugas.
