Isa ang patay samtang isa ang pilason matapos nga natumba ang truck sa Araneta Street, Purok Progreso, Barangay Sum-ag, Bacolod City, Domingo sang kaagahon.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, nagikan sa Murcia ang truck kag pabalik na kuntani sa banwa sang Isabela.
Antes ang Sum-ag Bridge, maga-overtake kuntani ang Isuzu truck sa motorsiklo kag tricycle sa right lane apang natalupangdan sini nga indi na sementado ang dalan gani ginlikaw sini ang truck pawala tubtub nga nadulaan ini sang kontrol kag natumba.
Bangod wala sang pwertahan sa side sang driver, nahulog si Alejandro Cartagena, 52 anyos, may asawa kag residente sang Yulo Street, Barangay 2 Poblacion, Isabela, Negros Occidental.
Bangod sa patal nga samad sang biktima sa ulo, ini ang gindulaan sang kabuhi.
Suno sa helper sini nga si Rolet Carampatana Jr., 33 anyos, single kag residente sang Sitio Buy-an, Barangay Tinongan Isabela, antes natabo ang insidente, may nagasunod sa ila nga isa ka pula ukon maroon nga pick-up truck.
Gani ginalantaw ang posibilidad nga nalapakan pa gid sang pick-up si Cartagena.
Suno kay Tuburan, ginatsekyar pa sang kapulisan kun may CCTV camera sa lugar agud makita kun ano ang natabo antes napatay si Cartagena.
Aminado naman si Carampatana nga wala na sini makita kun ano ang natabo sa driver.
Ang helper ang nag-agom sang minor injuries gani wala na ini nagpaadmit sa ospital.
