Nagtipon ang linibo ka mga tawo sa dalanon sang Tel Aviv, Israel sa pagpamatok sa plano ni Prime Minister Benjamin Netanyahu nga pabaskogon pa gid ang kapin sa duha ka tuig na nga giyera sa Gaza agud matapos na ang kinagamo.
Ini kasunod sa desisyon sang security cabinet sang prime minister’s office nga sakupon ang Gaza City kag pasanyogon ang military operations sa Palestinian territory apisar sa lapnagon nga pagpamatok diri sang publiko kag pagpaandam sang militar nga ang himoon nga tikang mahimo makahalit sa mga hostages.
Bangod sini, nagbaton sang kritisismo ang Israeli government halin sa publiko kag sa European allies sini.
Sa bahin sang Tel Aviv, makapila ka beses nga may ginpatigayon nga rally sa pagpanawagan sa gobyerno nga magpatigayon sang ceasefire kag hostage deal sa Hamas.
Kapin sa 100,000 ka mga indibidwal ang nagtipon kahapon agud magpatigayon sang protesta.
Bitbit sang mga nagaprotesta ang hayahay sang Israel kag mga placards nga may imahe sang mga hostage.
Iban may dala nga mga placard nga nagapakita sang ila kaakig sa gobyerno kag nagaduso kay Trump nga maggiyo agud mapa-untat ang plano ni Netanyahu.
Samtang ang iban naman naga-uyat sang mga imahe sang mga kabataan sa Gaza nga ginpatay sang militar./////
