Ginkumpirmar sang Executive Assistant for Operations sang Sipalay City nga ginapangita pa ang 14 anyos nga bata nga lalaki nalunod matapos magpaligo sa Campomanes Bay sa bahin sang Barangay Maricalum sa ciudad sang Sipalay kahapon sang hapon.
Sa interview sang Bombo Radyo Bacolod kay Dionelo Bogtae, apat ka mga magpakaisa ang nagpaligo sa nasambit nga beach kun sa diin ang tatlo ang nasalbar samtang ang isa ang nalunod kag ginapangita pa tubtob sa karun.
Ang tatlo nga nasalbar ang gindala sa Sipalay City Health Office.
Suno kay Bogtae, padayon pa ang search and rescue operation sang katapo sang Philippine Coast Guard sa ciudad sang Sipalay, Sipalay City Disaster Risk Reduction Manage ment Office kasubong man ang Bantay-Dagat sa nalunod nga 14 anyos nga solterito.
Apang nag-untat ang mga otoridad kahapon sa pagpangita sa bata bangud sa malain nga tyempo kag magaresume sila subong nga adlaw.
Suno sa CDRRMO Head, ang lisensya sang magpakaisa ang magjogging apang nagpaligo ang mga ini sa nasambit nga resort.
Suno kay Bogtae bangud sa mabaskog nga current mahimo nga nakakadto sa madalom nga bahin sang dagat kag nalunod ang 14 anyos.
Ang Campomanes Bay ang natago nga lugar gani indi man dalagko ang balud kag ginahimo sheltering areas sang mga barko sa tion maglabay sa Sipalay kag matabuan tama kadalagko ang balud.
Sa pihak nga bahin, wala naman sa karun sang evacuees sa evacuation center sang ciudad kasunod sang ginpatigayon nga preemptive evacuation sa ciudad sang Sipalay.
Samtang gina-abisuhan ang mga mananagat nga ipaiway lang ang pagpalawod bangud sa dalagko nga pagbalod kag ang mga residente malapit sa suba ang ginapaaligmat bangud sa padayon nga pag-ulan dala sang Hanging Habagat.
