BACOLOD CITY — Nagalab-ot sa 15 ka mga indibidwal kag negosyante sa Negros Island Region ang napasakaan sang kaso nga tax evasion.
Ini ang ginkumpirmar nanday Bureau of Internal Revenue (BIR) Commissioner Caesar Dulay kag BIR Revenue Region 12 Director Atty. Eduardo Pagulayan Jr sa ginpatigayon nga press conference kahapon.
Suno sa mga BIR officials, may masobra 40 ka mga indibidwal kag negosyante sa bilog nga pungsod ang napasakaan sang kaso bangud sa indi pagbayad sang nagakaigo nga buhis kag 15 sa mga ini ang gikan sa Negros Occidental kag Negros Oriental.
Suno kanday Commissioner Dulay kag Director Pagulayan, hugot ginapatuman sang BIR ang Run After Tax Evaders (RATE) kun sa diin ang mga mahimo mamultahan kag mapriso ang mga mapamatud-an nga wala nagbayad sang buhis.
Nagalaum naman ang BIR officials nga pagabayaran sang mga pribado nga indibidwal kag negosyante ang ila mga layabilidad sa gobyerno agud indi magpangatubang sang kaso.
