BACOLOD CITY-Wala na naluwas ang duha ka tuig nga bata nga lalaki matapos malumos sa pozo negro sa Salvador Benedicto, Negros Occidental kahapon.
Suno sa imbestigador sang Salvador Benedicto Police Station nga si Police Staff Sergeant Ramon Juablar, nagsunod ang bata sa pakaisa sini nga anom katuig agud magpaligo sa bubon.
Matapos nagpaligo sa bubon, nagbalik ang anom ka tuig kag ang biktima sa sulod sang ila balay.
Naggwa liwat ang pakaisa sang biktima kun sa diin wala natalupangdan sang pamilya sini nga naggwa man ang dos anyos nga bata kag nagderetso sa likod sang ila balay kag naghampang sa tubig sa napuno nga pozo negro.
Suno kay Juablar, posible nga nagsandok ang bata sang tubig sa pozo negro kag nadanlog ini bangod mahumok ang duta.
Gindala pa sa ospital ang biktima apang gindeklarar na nga dead on arrival.
