Patay ang duha ka persona, samtang pilason naman ang duha ka iban pa matapos ginluthang sang apat man ka suspect sa Hacienda Nuning, Brgy Maytubig, Isabela, Negros Occidental alas-10:15 kagab-i.
Ang mga napatay ang ginkilala nga sanday Roger Guansing, 58 anyos, kasado, laborer; kag Landry Patricio, 34 anyos, single, driver.
Samtang pilason naman sanday Harlim Tando, 57 anyos, kasado, driver; kag Diolito Patricio, 74 anyos, balo, driver, nga lunsay luwas na sa katalagman.
Natumod naman ang apat ka suspect nga sanday Alyas Jorie, Jomarie, JA, kag Adonis, nga padayun pa nga ginapangita sang kapulisan.
Ang mga biktima kag suspects, ang lunsay residente sa lugar, gani daan nga hiligut-anon ang isa sa ginalantaw nga motibo sa krimen.
Sa inisyal nga imbestigasyon sang Isabela Municipal Police Station, naga-inom sang makahulubog nga ilimnon sa balay ni Harlem ang mga biktima sang hinali nga nagsulod sa balay si Jorie kag nagpangluthang.
Si Roger ang naigo sang bala sa natuo nga mata, si Diolito ang naigo naman sa natuo nga abdomen nga nagresulta sang ila nga kamatayon.
Si Harlim ang naigo naman sa nawala nga abdomen, samtang si Landry ang may igo sa natuo nga bahin sang iya nga guya kag butkon.
Ang mga biktima ang gindala naman sa Ignacio I. Arroyo Memorial District Hospital, samtang nagpatigayon man sang hot pursuit operation ang kapulisan sa mga suspect.
