27 na sa 34 ka mga persons under investigation (PUIs) sa coronavirus disease 2019 (COVID-19) sa Bacolod ang nadischarge kag fully recovered na.
Sa update nga ginpadala ni Dr. Grace Tan, spokesperson sang Inter-Agency Task Force Against Coronavirus, 34 ang kabug-usan nga PUI sa ciudad kun sa diin nadischarge na sa mga ospital kag yara sa maayo na kahimtangan ang 27; apat ang admitted sa isolation rooms kag tatlo ang napatay.
Suno kay Tan, kalakip sa apat nga na-isolate ang 40 anyos nga lalaki nga yara sa kritikal nga kondisyon; 26 anyos nga babaye nga gina-alegar may contact sa isa ka PUM kag estable ang kondisyon; 60 anyos nga lalaki nga may yara sang lung cancer kag travel history sa Manila; kag 22 anyos nga babaye kag yara man sa maayo nga kondisyon.
Ang nagkalamatay naman ang ginalakipan sang 60 anyos nga lalaki nga nagnegatibo ang resulta; 62 anyos nga babayi nga may travel history sa Manila kag may exposure sa confirmed case, may yara sang co-morbidity-cardiac problem kag diabetes; kag 42 anyos nga lalaki nga driver nagikan sa Cebu.
Sa karun, may yara sang kabug-usan nga 2,225 ka mga persons under monitoring (PUMs) sa Bacolod kun sa diin 646 ang padayon nga ginamonitor, anom ang nangin PUI nga may yara sang mild nga sintomas, 35 ang padayon pa nga gina-locate kag 1538 ang nakatapos na sang ila home quarantine.
May yara naman sang lima ka mga kompirmado nga kaso sang COVID-19 sa ciudad.
