Patay ang 28-anyos nga lalaki matapos gintiro sa Purok Kawayan, Barangay Banago, ciudad sang Bacolod kaina sang kaagahon.
Ginkilala ang biktima kay Jerol Marcellana kag residente man sang amo nga lugar.
Sa interview sang Bombo Radyo kay Police Capt. Armilyn Vargas, station commander sang Bacolod Police Station 2, nagapungko si Marcellana sa gwa sang computeran sa iskinita kaupod ang iban pa nga lalaki sang nagpalapit ang lalaki nga nagasuksok sang jacket kag helmet kag nagpamangkot kun sa diin si JR.
Sang nagsabat ang mga ini nga indi nila kaupod si JR, nagbalikid ang suspetsado kay Marcellana kag gintiro.
Bangud sa apat ka igo sang bala sa nagkalain-lain nga bahin sang lawas, si Marcellana ang gindeklarar nga patay na pag-abot sa Corazon Locsin Montelibano Memorial Regional Hospital.
Suno kay Vargas, ginahibalo pa sang imbestigador kun si Marcellana gid man ang tuyo sang suspetsado ukon may lain pa gid nga lalaki nga JR ang ngalan.
Si Marcellana ang residente mismo sang Purok Kawayan kag nagaupod sa iya nga amay kun may sideline nga trabaho agud nga maka-income apang wala ini sang regular nga trabaho.
Nagagwa man ang impormasyon nga nagagamit si Marcellana sang illegal nga druga kag nagabaligya man ini.
Sa karon, lansihanay sa illegal nga druga ukon daan nga hiligut-anon ang isa sa mga motibo sa krimen apang kinahanglan pa sang Police Station 3 sang dugang nga ebidensya angot diri.
