Ginadihon na ang pagpasaka sang kaso batok sa mga suspek nga nagbato sa La Castellana Municipal Police Station sa drug buybust operation sa Sitio Talaptap, Brgy Talaptap, nga nagresulta sa pagkapatay sang isa ka police non-commissioned officer kag pagkasamad sang duha pa ka police personnel.
Kagab-i, sang tuyo nga dakpon sang kapulisan ang subject person nga si Edward Acupan, 41 anyos, nagbato ini sa mga pulis kun sa diin nagbulig man sa pag-atake ang iloy sini nga si Delia Acupan, 68 anyos.
Ginbuno ni Edward Acupan sa bulig sang iya iloy ang mga pulis nga nagresulta sa pagkapatay ni Police Master Sergeant Devy Carampatana, personnel sang Station Drug Enforcement Team (SDET), samtang pilason naman ang Deputy Chief of Police nga si Police Captain Michael Muñez; kag Police Corporal Gerson Guache.
Sa interview sang Bombo Radyo Bacolod kay La Castellana Vice Mayor Rhummyla Nicor-Mangilimutan, padayon ang imbestigasyon sa karun samtang ginadihon na ang pagpasaka sang kaso.
Suno diri, yara sa ospital si Muñez apang estable na ang kondisyon sini matapos mag-agom sang multiple stab wounds samtang wala na gindala pa sa ospital si Guache nga may minor injuries.
Si Edward Acupan ang ginabulong sa La Castellana Rural Health Unit samtang yara sa police custody kag ang iloy sini nga si Delia ang yara sa kustodiya sang La Castellana Municipal Police Station.
Suno kay Mangilimutan, ang kapulisan nagabulig nga mapatuman ang layi kag ang natabo amo ang epekto sang illegal nga droga.
Nagapati ini nga wala sang bisan sin-o man nga nagagamit sang droga ang indi apektado ang ila paminsaron.
Hugot sini nga ginkondenar ang ginhimo sang subject person bangod ang pulis naghimo lamang sang ila trabaho para sa kalinong kag mapalayo ang illegal nga droga sa pumuluyo.
