Gintutukan sang mga pumuluyo sang ciudad sang Bacolod ang ikaduha nga hugnat sang Debate sa Bombo kun sa diin nangin mainit ang pag-atubangay sang mga kandidato sa pagka-alkalde sang ciudad sa nagahilapit nga 2019 midterm elections sa Mayo 13.
Nagdugay sang malapit duha ka oras ang debate kun sa diin nagplastar sang ila plataporma de gobyerno kag nagsabat sa mga isyu sanday incumbent Mayor Evelio Leonardia, former Councilor Jocelle Batapa-Sigue kag ang mediaman nga si Ray Carmona.
Kalakip sa mga gindiskusyunan amo ang problema sa tubig, segregation sang basura, pagresolbar sa krimen sa Bacolod kag ginhatagan man sila sang kahigayunan nga maghaboy sang pamangkot sa isa kag isa.
Ginhatagan man sang tsansa ang mga supporters ang magtimbang nga kampo nga maghaboy sang pamangkot nga sabton sang kandidato.
Nagbantay man sa idalom sang estasyon sang Bombo Radyo ang ila nga mga supporters.
Antes natapos ang debate, nagpirma sa peace covenant ang mga kandidato bilang pasalig nga ila tinguhaan nga mangin malinong ang eleksyon.
Nag-shake hands man ang mga ini kag nagpakuha sang litrato.
Ginplastar naman sang tatlo ka mga kandidato sa pagka-alkalde sang ciudad sang Bacolod kun ano ang masaligan sang mga pumuluyo sa tion nga sila ang maeleher bilang city mayor sa nagahilapit nga eleksyon sa Mayo 13.
Suno kay anay City Councilor Jocelle Batapa-Sigue, tion na agud maeksperyensiyahan sang mga Bacolodnon ang pagbag-o sa sistema nga ginasunod sang city government kaangay sang online payment system kag iban pa nga transaksyon.
Plano man sini nga magbutang sang TESDA training center sa Bacolod kag magdugang sang mga manunudlo sa Alternative Learning System.
Iga-convene man ni Batapa ang Bacolod Traffic Authority Council kag igahatag ang ECOLA sang mga manunudlo sa husto nga oras.
Ginbida naman sang mediaman nga si Ray Carmona ang iya mabakod nga political will sa pagpatuman sang mga ordinansa sang ciudad.
Suno diri, mas mabakod ang iya political will kun ipaanggid sa iya mga kasumpong.
Ginpasalig sini nga hawanan sang dalan nagikan sa illegal structures agud indi maggutok ang dalagan sang trapiko.
Samtang ginbida naman ni incumbent Mayor Evelio Leonardia ang pagbalik sang business confidence sa Bacolod sang nagbalik siya nga alkalde sang tuig 2016.
Napanubo suno sa iya ang proseso sa pagrenew sang business permit kag nagdangat sa 21 mil ang nagrenew sang lisensya sang tuig 2018.
Bangud sini, mas maayo suno kay Leonardia kun may yara sang consistency sa implementasyon sini.
Yari ang video sang bilog nga debate, Huwebes sang aga.
