3 days Provincial Youth Leadership Summit 2026, ginpatigayon sa banwa sang Murcia
-- ADVERTISEMENT --

Ginapatigayon tatlo ka adlaw nga Provincial Youth Leadership Summit 2026 sa Mambukal Resort and Wildlife Sanctuary sa Barangay Minoyan, banwa sang Murcia humalin sang Nobyembre 20 tubtob subong nga adlaw Nobyembre 22.

Sa interview sang Bombo Radyo kay CPT Arvin Clark Talco, Civil Military Officer sang 303rd Infantry Brigade, tinutuyo sang aktibidad nga ma-empower ang mga youth leaders nga mangin responsable kag mangin epektibo nga lider sa ila tagsa ka mga komunidad.

Nagatuktok ang aktibidad sa paghatag sang skills, ihibalo kag values sa mga youth leaders.

Lakip sa mga nagpartisipar amo ang mga youth student leaders gikan sa nagkalain-lain nga ciudad kag banwa sa bug-os nga probinsya.

Ini ang ginapatigayon last quarter sang kada tuig kun sa diin gina-una anay ang municipal-level summit antes magpatigayon sang provincial level, kag sunod ang regional level.

-- ADVERTISEMENT --

Suno kay Talco, ang mga napilian nga participants amo ang mga youth leaders kag officers kag estudyante nga nagpakita sang ila kaalam sa ginpatigayon nga municipal-level summit.

Para sa iya, ang nasambit nga summit ang tuman ka importante bangud paagi sini, magiyahan kag mahatagan sang ihibalo ang mag pamatan-on nahanungod sa mga oportunidad nga mahimo nga ila makadtuan pagkatapos sang ila pag-eskwela.

Dugang pa ni Talco, paagi man sini, makahatag sila sang positibo nga kontribusyon sa ila komunidad kag makabulig sa nation-building kag peace and development.