Napasakaan na sang kaso kahapon ang tatlo ka mga suspetsado sa pagtiro-patay sa anay Barangay Tanod sa Barangay 22, Bacolod City, sang Biyernes.
Madumduman nga tatlo ang gindakop sa pagtiro-patay kay Ruben Altamira, residente sang Prk Gahili-ugyon, Brgy 23, Bacolod City, nga anay Barangay Tanod kag nagabulante sang tela.
Ang tatlo ka suspek nga nadakpan ang ginalakopan sang mag-utod nga sanday alyas Jeremy kag alyas Junjun kag ang ila bayaw nga si alyas Jonathan.
Sa interview sang Bombo Radyo kay Police Captain Efren Legada, Station Commander sang Bacolod Police Station 1, ang mag-utod nga suspek ang magapangutubang sang kaso nga murder kag illegal Possession of Firearms samtang ang ila bayaw naman ang napasaakan sang kaso nga illegal Possession of Firearms.
Suno kay Legada, ginahulat nalang sa karun ang resulta sang paraffin test sa tatlo ka mga suspetsado agud matumod kun sila ang may iban pa nga kaso ukon grupo sa ciudad sang Bacolod.
