Gilayon nga ginpadulongan sang mga personnel sang Department of Social Services and Development (DSSD) ang area kun sa diin natabo ang pagmaltratar sang isa ka lalaki sa isa ka menor de edad nga babayi.
Sila ang na-locate sa Barangay 16, kun sa diin temporaryo nga ginkuha ang bata kag gindala sa DSSD samtang ang lalaki naman nga ginapatihan amay sang bata ang gindala sang mga kapulisan sa Bacolod Police Station 1.
Sa interview sang Bombo Radyo Bacolod kay Dr. Richelle Verdeprado-Mangga, head sang Bacolod DSSD, temporaryo nga yara sa ila kustodiya ang bata samtang gina-assess sang maayo ang direksyon sang kaso.
Suno diri, ila ginkuha ang bata sa kustodiya sang amay sa pagsunod sang parens patriae principle, sa diin ang state ang may yara sang katungdanan nga mangin guardian sang isa ka indibidwal nga wala sang ikasarang nga buhion ang kaugalingon kaangay sang mga kabataan.
Pahayag ni Dr. Verdeprado-Mangga, mahimo makuhaan sang parental authority ang isa ka ginikanan kun mapamatud-an nga indi maayo ang kahimtangan sang bata sa iya nga kustodiya.
Samtang pasakaan sang kaso ang amay bangod sa pagsakit sa iya menor de edad nga bata.
Sa interview sang Bombo Radyo Bacolod kay Police Major Rondyl Tapang, Station Commander sang Bacolod Police Station 1, gilayon nga gindakop sang mga otoridad ang amay sa ila nga puluy-an sa Barangay 16.
Suno diri, aminado man ang amay sa iya nahimo gani ginadihon na ang pagpasaka sang nagakaigo nga kaso.
Pahayag ni Tapang, tsekyaron pa nila kun may yara sang previous record ukon kaso ang amay sang menor de edad.
