BACOLOD CITY- Patay ang tatlo ka gina-alegar miembro sang armed group nga naengkwentro sang mga pulis sa banwa sang Calatrava, Negros Occidental.
Sa impomasyon nga nakuha sang Bombo Radyo Bacolod, Mancao group ang nakaengkwentro sang mga pulis sa Brgy. Cambayobo, Calatrava pasado alas-10:00 kagab-i.
Gina-alegar nga ang nasambit nga grupo ang ginapamuan ni Sabino “Cadong” Mancao nga anay miembro sang New People’s Army (NPA) kag isa man sa mga napatay.
Kalakip man sa nagkalamatay sanday Ramil Castor kag Emar Himang.
Nakapalagyo naman ang tatlo ka miembro sang grupo nga tubtob sa karun wala pa nakilal-an samtang tatlo man ang arestado.
Ginkilala ang mga naaresto nga sanday Romnick Octavio, 28-anyos kag Pepe Lausa, 51-anyos lunsay residente sang Brgy. Cambayobo, kag Josie Castor, 42-anyos sang Brgy. Bug-ang, Toboso nga live-in partner ni Mancao.
Nakuha naman sa posisyon sang tatlo ka mga arestado ang duha ka homemade caliber 45 pistol nga may 5 live ammunitions kag isa ka homemade caliber 38 revolver nga may 5 live ammunitions.
Samtang nakuha naman sa ginluntaran sang engkwntro ang KG-9 machine gun, 12 gauge shotgun, home made snub 38 caliber revolver kag nagkalain-lain nga cartridges.
Ginapahayag nga ang Mancao group ang responsable sa extortion kun sa diin nagapangayo ang mga ini sang kwarta sa mga residente kag ginagamit pa ang ngalan sang alkalde.
Sa interview kay Police Chief Inspector John Joel Batusbatusan, hepe sang Calatrava Municipal Police Station, madugay na nga ginamonitor ang grupo kag gin-operate ini kagab-i upod ang 605th Regional Mobile Force Battalion (RMFB) sa pagpamuno ni PCI Yolando Lago.
Suno pa sa hepe, nagdugay sang lima ka minutos ang engkwentro apang indi man sini mapahayag kun sin-o ang una nagpalupok.
Samtang suno naman kay Castor, ang kapulisan ang una nga nagpalupok kag nakibot lang sila bangud nga manugtulog na sila kuntani kagab-i sang nagluntad ang insidente.
Suno pa kay Batusbatusan, indi kabahin ang mga ini sang New People’s Army bangud nga may kaugalingon nga armed group ang Mancao group.
