Ginhilway na ang 31 sa 42 ka mga persona nga gin-aresto sang kapulisan sa raid sa apat ka mga opisina sang progresibo nga grupo sa ciudad sang Bacolod nagligad nga Oktubre 31.
Base sa resolusyon nga gin-isyu ni Assistant City Prosecutor Fernand Castro, wala sang bastante nga basehan nga kasuhan ang 31 ka mga persona nga yara sa mga opisina sang Anakpawis, Kilusang Mayo Uno kag Gabriela.
Sa 42 nga nadakpan, apat ang nagapangatubang sang bailable nga kaso, pito ang non-bailable samtang 31 ang naabswelto.
Lakip sa mga ginhilway ang 21 ka mga anay empleyado sang Vallacar Transit Inc. nga yara sa opisina sang KMU agud magpakonsulta sang ila nga labor concerns.
Una diri, naghulat ang fact-finding team sang Makabayan bloc sang pila ka oras sa guwa sang Negros Occidental Police Provincial Office (NOPPO) headquartes antes makasulod matapos sila ginbalabagan.
Sa interview sang Bombo Radyo Bacolod kay Bayan Muna Representative Carlos Isagani Zarate, iya ginpahayag nga luyag nga bungkagon sang Duterte administration ang mga progresibo nga grupo sa Negros.
Dugang pa sini nga luyag pahipuson ang ila nga mga grupo paagi sa pagserbi sang search warrant kag pagtanom sang mga ebidensiya.
Ginpasiguro man ni Zarate nga ila depensahan ang 11 ka mga nabilin nga naaresto.
Ginarespeto sang tagpamaba sang Joint Task Force Negros nga si Army Capt. Cenon Pancito III ang resolusyon sang City Prosecutor’s Office sang Bacolod nga paghilway sa 31 ka mga nadakpan sa ginpatigayon nga joint simultaneous operation sang pulis kag militar sa apat ka mga opisina sang mga progresibo nga grupo sa ciudad sang Bacolod matapos nga napamatud-an nga wala ini sang probable cause.
Sa interview sang Bombo Radyo Bacolod kay Pancito, iya ginpahayag nga nagapamatuod lamang ini nga may yara sang iregularidad bangud may 11 pa nga nabilin nga liable sa kaso sa paglapas sang iligal nga paghupot sang armas kag eksplosibo.
Dugang pa ni Pancito nga ‘pakitang-tao’ lamang ang ginahimo sang Makabayan bloc bangud kun matuod nga concerned sila sa mga nagkaladakpan dapat wala na nila ginpadugayan pa ang pagpadulong sa ciudad.
