Patay ang 34 anyos nga mangunguma matapos ginbuno sang pila ka beses sang kakilala man sini nga mangunguma sa Purok Caimito, Barangay Quezon, siyudad sang San Carlos.
Ang biktima ang ginkilala nga si Jesus Manaytay, 34 anyos samtang ang suspetsado naman ang ginkilala nga si Vicente Bandoy, 60 anyos, lunsay mga residente sang nasambit nga lugar.
Sa inisyal nga imbistigasyon sang mga kapulisan, gin-imbitar ni Bandoy si Manaytay nga mag-inom sa ila nga balay, apang gilayon na lang nga nagtuga sang gamo ang biktima samtang yara sa sulod sang puluy-an sang suspetsado.
Ginhingyo sang suspetsado ang biktima nga magkalma apang ini ang nagtuga sang pagbaisay sa tunga sang duha nga gilayon man nagkinagamo.
Nag-agom sang pila ka buno ang biktima sa likod nga bahin sang lawas sini nga nagresulta sang iya kamatayon.
Samtang boluntaryo naman nga nagsungka ang suspetsado sa Baranagay hall kag sa karun yara na ini sa kustodiya sang mga kapulisan.
Samtang, nagapalano naman ang pamilya sang biktima nga indi na lang magpasaka sang kaso sa baylo nga buligan na lang sila sa pagpalubong.
