BACOLOD-Patay ang isa ka lalaki matapos ginluthang sa Purok Arao, Brgy. Estefania ciudad sang Bacolod mga alas-7:00 sini nga gab-i.
Ginkilala ang biktima kay Jomar Parofil, 37-anyos, may asawa kag tatlo ka mga kabataan kag residente sang nasambit nga lugar.
Sa impormasyon nga nakuha sang Bombo Radyo Bacolod sa manghod sang biktima nga nagpakilala lamang kay Alyas Neneng, anom ka igo sang luthang ang naangkun sang iya magulang kag dead-on-arrival ini sa hospital.
Santo sa pahayag sang mga saksi sa krimen, nagatambay sa isa ka tiangge ang biktima sang ini ang ginpalapitan sang tatlo ka mga lalaki nga nagpakilala nga mga pulis apang nakasibilyan kag ginposasan rason nga nagdalagan ini.
Apang sa iya nga pagdalagan, ginluthang ini sang mga suspetsado.
Ginkakibot naman ni Alyas Neneng ang natabo sa iya magulang bangud suno sa iya, wala man ini sang kontra.
Nahisayran naman sa manghod nga napriso sang una ang iya magulang bangud sa droga kag indi lang ini sigurado kun tuig 2016 ukon 2017 ini nakaguwa sa prisuhan.
Samtang, padayon karun nga gina-imbestigaran sang Police Station 4 ang krimen kag ginatsekyar pa ang iban nga impormasyon tuhoy sa biktima.
Lakip na diri ang abyan sang biktima nga masami nagakadto sa iya kag yara man sa lugar sang ini ang ginpatay.
Indi pa man makumpirmar sang officer-in-charge sang Police Station 4 nga si Police Lieutenant Rondel Tapang ang tuhoy sa kaso ni Parofil bangud wala pa siya sang nauyatan nga mga dokumento.
Narekober naman sa crime scene ang pila ka bala sang caliber 45 nga armas.
Samtang nagapati si Tapang nga luyag lang sang mga suspetsado nga patalangon ang mga residente sa pagpakilala sang mga ini nga mga pulis sila.
