Laslas ang liog kag wawa ang tiyan sang isa ka 37-anyos nga lalaki matapos ginhatok-hatok labo sang mag-utod nga suspetsado sa Hda. Napilas 7, Barangay E. Lopez, Silay City sang tinalikdan nga Enero 9 sang gab-i.
Ginkilala ang biktima kay John Galagate samtang ang mga suspetsado naman amo sanday Ronilo Panaguiton kag Ronald Panaguiton nga lunsay residente sang amo nga lugar.
Sa interview sang Bombo Radyo Bacolod kay P/Lt. Guilmor Cuare, deputy chief of police sang Silay City Police Station, ginpahayag sini nga nagalakat sa dalan ang biktima kag papauli na kuntani sang hinali lang ini nga gintambangan sang mag-utod halin sa katabuhan kag ginhatok-hatok sang labo.
Nakaangkon si Galagate sang madamo nga pilas sa nagkalain-lain nga bahin sang iya lawas nga nangin tunaan naman sang iya gilayon nga kamatayon.
Nahibaluan nga brownout kag naga-ulan sang natabo ang insidente.
Santo naman sa imbestigasyon sang kapulisan, may daan nga hiligut-anon ang biktima kag isa sa mga suspetsado kag may yara naman sila sang barangay cases.
Suno kay Cuare, nabakulan na sadto sang isa sa mga suspetsado si Galagate kag bangud sa kaakig sang biktima, nagapanghaboy ini sang bato sa balay sang mag-utod nga Panaguiton.
Sa karon, nagapabilin nga �at large� ang mga suspetsado.
