BACOLOD CITY – Wala malab-ot ang ginalauman sang Central Negros Electric Cooperative (CENECO) nga buhin sa konsumo sang kuryente durante sang obserbasyon sang Earth Hour kagab-i.
Ang Earth Hour nagsugod las-8:30 kag nagtakop las-9:30 kagab-i kun sa diin ginpatay ang mga suga kag wala ginagamit nga appliances nga nagagamit sang kuryente bilang kabahin sang kampanya sa pag-amlig sang kalibutan.
Angot sini, ang mga pumuluyo sa ciudad sang Bacolod, lakip na ang bug-os nga franchise area sang CENECO ang nag-obserbar man sang Earth Hour.
Apang suno kay CENECO General Manager Sulpicio Lagarde Jr., nagalab-ot lamang sa 4.6 megawatts ang nabuhin sa gingamit nga kuryente kag ini ang mas manubo ikumparar sa 7 tubtob 8 megawatts nga ginalauman sang electric cooperative.
Mas manubo man ini sang 53 percent ikumparar sa 7.2 megawatts nga buhin sa gingamit nga kuryente durante sang obserbasyon sang Earth Hour sang nagligad nga tuig.
Ginpabutyag sang CENECO General Manager nga natingala man sini sa resulta sang obserbasyon kagab-i bangud mas madamo na ang konsumidor subong apang dyutay lamang ang nag-ugyon.
Ginalantaw nga madamo ang wala nakahibalo ukon nalipat tuhoy sa obserbasyon sang Earth Hour kagab-i.
