Apat ka mga suspetsado sa cattle rustling ukon pagpangawat sang karbaw kag baka sa Ilog, Negros Occidental ang nadakpan sang mga pulis sa banwa sang Cauayan, kaina sang kaagahon.
Sa interview sang Bombo Radyo sa hepe sang Ilog PNP nga si Police Major Norberto Barniso, nagbulig ang mga miyembro sang Cauayan Police Station agud mapatigayon ang operasyon sa Sitio Apayong, Barangay Guilhungan.
Lima kuntani ka persona ang nadakpan apang menor de edad ang isa gani ginhilway.
Antes ang operasyon, 10 ka mga tag-iya sang karbaw kag baka sa Ilog ang nagdangop sa police station humalin sang Hunyo 21 tubtub 24 agud ipablotter ang pagkadula sang ila kasapatan.
Sa bulig sang asset sang Ilog PNP, natultulan ang ginahukmungan sang mga suspetsado sa Cauayan.
Ang mga arestado suno kay Barniso amo ang ginasugo nga mag-ihaw sang kinawatan nga sapat agud ibaligya.
Isa lang ka baka ang narekober sang mga pulis kag ginatumod pa kun sin-o sa mga tagreklamo ang nagapanag-iya sini.
Suno sa mga arestado, naihaw na nila ang apat kag nabaligya ang isa, samtang ang lima naman ang gindala sa lapta-lapta nga lugar.
Sa tion nga magpangawat suno sa hepe, may lookout ang mga suspetsado kag lain naman ang nagaguyod sang kinawatan.
Sa karon, wala pa nahingadlan ang mga arestado.
